توہین عدالت کیس؛ طلال چوہدری کو جواب جمع کرانے کیلئے مزید مہلت مل گئی

 اسلام آباد: سپریم کورٹ نے وزیرِمملکت برائے داخلہ اور مسلم لیگ (ن) کے رہنما طلال چوہدری کو توہین عدالت کیس میں جواب جمع کرانے کے لئے پیر تک مزید مہلت دے دی ہے۔

ایکسپریس نیوز کے مطابق سپریم کورٹ میں وزیرِمملکت برائے داخلہ طلال چوہدری کے خلاف توہین عدالت کیس کی سماعت جسٹس اعجاز افضل کی سربراہی میں تین رکنی بینچ نے کی۔ طلال چوہدری کے وکیل کامران مرتضیٰ عدالت میں پیش ہوئے اور مؤقف پیش کیا کہ مجھ سے پہلے طلال چوہدری کی وکیل عاصمہ جہانگیر تھیں تاہم اب وہ اس دنیا میں نہیں رہیں اور اب مجھے یہ خدمات دی گئی ہیں لہذٰا عدالت مجھے 10 روز کی مہلت دی جائے۔

اس خبرکوبھی پڑھیں: طلال چوہدری کو وکیل کرنے کیلیے ایک ہفتے کی مہلت

جسٹس اعجاز افضل نے ریمارکس دیئے کہ گزشتہ سماعت میں بھی طلال چوہدری کو وقت دیا گیا تھا اور اب جو تاخیر آپ مانگ رہے ہیں وہ ضروری نہیں۔ کامران مرتضیٰ کا کہنا تھا کہ میرا ذاتی مسئلہ ہے جس کے لئے مہلت مانگ رہا ہوں اور میں سینیٹ کا امیدوار بھی ہوں جس کی تیاری کرنی ہے۔ جسٹس مقبول باقر نے ریمارکس دیئے کہ اس کیس کی آج تیسری سماعت ہے اور تمام فریقین  تک کیس کی کاپیاں بھی پہنچ گئی ہیں۔ عدالت نے طلال چوہدری کو جواب جمع کرانے کے لئے پیر تک مہلت دیتے ہوئے کیس کی سماعت ملتوی کردی۔

اس خبرکوبھی پڑھیں: طلال چوہدری کو توہین عدالت کا نوٹس جاری

The post توہین عدالت کیس؛ طلال چوہدری کو جواب جمع کرانے کیلئے مزید مہلت مل گئی appeared first on ایکسپریس اردو.

from ایکسپریس اردو http://ift.tt/2ESojwq
via IFTTT