گدھوں اور کتوں کی کھالوں کا کیس پولیس نے کمزور کردیا

کراچی: گدھوں اور کتوں کی کھالوں کی برآمدگی کیس میں پولیس اور ملزمان کی ساز باز سامنے آگئی اور ملزمان پر قابل ضمانت دفعات لگاکر مقدمہ کمزور بنادیا گیا ہے۔

افغان باشندے سمیت دونوں ملزمان کو عدالت نے قابل ضمانت دفعات کے باعث ضمانت پر رہا کردیا عدالت نے ملزمان کو فی کس 20ہزار روپے کے مچلکے جمع کرانے کے عوض رہا کردیا، کورنگی صنعتی ایریا پولیس نے گرفتار ملزمان افغانی باشندے عبدالحمید اور رضوان کو جوڈیشل مجسٹریٹ شرقی کے روبرو پیش کیا پولیس نے بتایا کہ ملزمان کو علاقہ مکینوں کی نشاندہی پر گرفتار کیا گیا ہے وکیل سرکار کا کہنا تھا کہ پولیس کا کوئی کردار نہیں علاقہ مکین نشاندہی نہ کرتے تو گدھوں اور کتوں کی کھالوں کا کاروبار جاری تھا۔

تفتیشی افسر نے بتایا کہ ملزمان کو گزشتہ روز کورنگی صنعتی ایریا سے گرفتار کیا ملزمان کے گودام سے پولیس نے 40 سے زائد بوریاں برآمد کی جن میں گدھوں اور کتوں کی کھالیں موجود تھیں گودام کے مالک کی تلاش جاری جس کے لیے چھاپے مارے جارہے ہیں ملزمان نے کھالیں افغانستان اور اندرون ملک سے درآمد کی وکیل صفائی نے انکشاف کیا کہ ایف آئی آر میں سیکشن قابل ضمانت ہے ان دفعات کے تحت ملزمان کو جیل نہیں بھیجا جاسکتا اور ان کے موکلوں کو اس سیکشن میں حوالات میں رکھا گیا۔

تفتیشی افسر نے کہا کہ افسران کا دبائو تھا جس کی وجہ سے حوالات میں رکھا، عدالت نے ملزمان کی ضمانت منظور کرلی عدالت نے ملزمان کو فی کس 20ہزار کے مچلکے جمع کرانے کا حکم دے دیا ملزمان کے خلاف تھانہ کورنگی صنعتی ایریا میں مقدمہ درج ہے واضح رہے کہ گزشتہ روز پولیس کے اعلیٰ افسر نے 4 ملزمان کی گرفتاری ظاہر کی تھی لیکن پولیس نے صرف 2 ملزمان کو عدالت میں پیش کیا ریمانڈ پیپر میں گودام کے مالک کی عدم گرفتاری ظاہر کی گئی ہے۔

دریں اثنا جوڈیشل مجسٹریٹ غربی نے کمسن بیٹے کو مار پیٹ کے بعد نالے میں پھینکنے کے الزام میں شقی القلب باپ کو 3 روزہ جسمانی ریمانڈ پر پولیس کے حوالے کردیا ہے ہفتے کو پاکستان بازار پولیس نے کمسن بیٹے کو مار پیٹ کے بعد نالے میں پھینکنے کے الزام میں شقی القلب باپ افروز کا جسمانی ریمانڈ حاصل کرنے کے لیے فاضل عدالت میں پیش کیا تھا۔

تفتیشی افسر نے عدالت کو بتایا کہ اورنگی ٹائون جرمن اسکول کے قریب جمعرات کی شب نالے سے 6 سالہ کامران کی لاش ملی تھی جو ڈوب کر ہلاک ہوگیا تھا ابتدائی طور پر مذکورہ واقعے سے متعلق کہا گیا تھا کہ کامران کھیلتے ہوئے نالے میں گرا تھا۔

بچے کی لاش ملنے کے بعد پولیس کو اطلاع ملی تھی کہ کمسن کامران کو اس کے والد نے گھر سے باہر لے جا کر مار پیٹ کی تھی اور بعدازاں اسے نالے میں پھینک دیا تھا جس پر پولیس نے ملزم افروز عالم کو حراست میں لے کر پوچھ گچھ کی تو اس نے اعتراف کیا کہ بیٹے کو غصے میں ماردیا ہے ملزم سے مزید تفتیش کے لیے پولیس نے 14 یوم کے جسمانی ریمانڈ کی استدعا کی تاہم عدالت نے 3 روز کے جسمانی ریمانڈ پر پولیس کے حوالے کردیا۔

The post گدھوں اور کتوں کی کھالوں کا کیس پولیس نے کمزور کردیا appeared first on ایکسپریس اردو.

from ایکسپریس اردو https://ift.tt/2Km1z7W
via IFTTT