عمران خان اپیلٹ ٹریبیونل میں پیش، نامکمل کاغذات نامزدگی پُر کردیے

اسلام آباد: چیئرمین تحریک انصاف عمران خان اپیلٹ ٹریبونل میں پیش ہوگئے اور نامکمل نامزدگی فارم بھی مکمل کرکے جمع کرادیا۔

ایکسپریس نیوز کے مطابق عوام کی فلاح و بہبود کی شق این پُر نہ ہونے کی وجہ سے قومی اسمبلی کے حلقہ این اے 53 سے عمران خان کے کاغذات نامزدگی مسترد کردئے گئے تھے۔ عمران خان کے کاغذات نامزدگی مسترد ہونے کے خلاف آج اسلام آباد ہائیکورٹ میں اپیلٹ ٹریبونل میں سماعت ہوئی۔ ٹریبونل کے جج جسٹس محسن اختر کیانی نے سماعت کی۔

عمران خان اپنے وکیل بابر اعوان کے ہمراہ ٹریبونل کے روبرو پیش ہوئے اور انہوں نے حلف نامے کی شق این پُر کردی۔ عمران خان نے فارم کی شق این میں نوٹ لکھا میں نےعوام کی فلاح و بہبود کے لیے نمل یونیورسٹی بنائی، کینسر اسپتال بنایا، عوام کو اپنے آئینی حقوق کی جدوجہد کرنے کا شعور دیا ہے۔ فارم مکمل کرنے کے بعد عمران خان نے میڈیا کے سامنے آنے سے گریز کیا اورعقبی دروازے سے واپس چلے گئے۔

واضح رہے کہ انتخابات میں حصہ لینے والے امیدوار کو کاغذات نامزدگی جمع کراتے وقت حلف نامے کی شق این کو پُر کرنا ضروری ہے جو کہ عوام کی فلاح و بہبود سے متعلق کام کے حوالے سے ہے۔  کاغذات نامزدگی جمع کراتے وقت عمران خان نے حلف نامے کی شق این پُر نہیں کی تھی جس کے بعد ان کے کاغذات نامزدگی مسترد کردئیے گئے تھے۔

The post عمران خان اپیلٹ ٹریبیونل میں پیش، نامکمل کاغذات نامزدگی پُر کردیے appeared first on ایکسپریس اردو.

from ایکسپریس اردو https://ift.tt/2txQE46
via IFTTT